Äänestää sinun vaalipaikassa vaalipäivänä

Sie saatat äänestää sinun vaalipaikassa vaalipäivänä.

• Vaalipäivä valtiopäivile, rekiuunivaalile ja kunnanvaalile oon aina syyskuun toisena pyhänä joka neljäs vuosi.
• EU-vaali piethään huhtikuussa, toukokuussa, kesäkuussa elikkä heinäkuussa joka viies vuosi. Vaalipäivä Ruottissa oon aina pyhäpäivänä.
• Sinun äänestyskortissa seisoo missä vaalipaikassa sie saatat äänestää vaalipäivänä ja vaalipaikan aukioloaijat.
• Sulla ei tarttte olla äänestyskortti matkassa mutta sulla pittää olla hyväksytty id-paperi elikkä joku matkassa joka saattaa toistaa sinun itenttiteetin jos äänivasthaanottaja ei tunne sinua. Se henkilö pittää siinä taphauksessa näyttää id-paperin.

Etukätheisäänestää

Sie saatat etukätheisäänestää missä vain koko maassa.

• Sie saatat etukätheisäänestää 18 päivä ennen vaalipäivää ja vaalipäihvään saakka.
• Sulla ei tarttte olla äänestyskortti matkassa mutta sulla pittää olla hyväksytty id-paperi elikkä joku matkassa joka saattaa toistaa sinun itenttiteetin jos äänivasthaanottaja ei tunne sinua. Se henkilö pittää siinä taphauksessa näyttää id-paperin.

Ottaa apua asiahenkilöltä

Ette äänestää asiahenkilön avula tarkottaa ette joku muu sinun eestä jättää sisäle äänesti sinun vaalipaikassa elikkä paikassa jossako piethään etukätheisäänestystä.

• Ensimäinen päivä ko sie saatat laittaa sinun asiahenkilöäänen oon 24 päivää ennen vaalipäivää. Asiahenkilö saattaa jättää sisäle sinun äänen vasta ko etukätheisäänestys aukea.

Sie saatat äänestää asiahenkilön kautta jos:

• sie olet sairas
• sie olet vanheempi
• sulla oon toimintarajotus
• sinua oon piätetty fankilassa elikkä kriminaalihoitolaitoksessa
• sie asut elikkä olet pitkin maalaispostinkuljetuslinjaa (ota yhtheyttä Postnord:in kansa).

Ottaa apua kunnalta

Jos sulla oon vaikea päästä vaalipaikale elikkä paikhaan jossako oon etukätheisäänestys etkä tunne kethään joka saattaa olla asiahenkilö sulle, niin sinun kunta saattaa järjestää ette äänivasthaanottaja tullee sinun työ ottamhaan vasthaan sinun äänen, niin sanottu kiertävä äänivasthaanottaja. Sie saatat ottaa yhtheyttä sinun kunnan kansa ette saaja lissää informasuunia.

Apua äänestämisen kansa paikassa

Sie, jollako oon toimintarajotus elikkä sen semmosta, saatat tahtoa apua äänivasthaanottajalta. Äänivasthaanottajilla oon vaitiolovelvolisuus eikä net saa kertoa kelheen mitä sie olet äänestänny. Sie saat kansa ottaa matkhaan jonku muun särmin taa auttamhaan sinua äänestämhään mutta äänivasthaanottaja häätyy aina kuitenki olla matkassa.

Kaikki paikat pitävät olla saatavia henkilöile joilako oon toimintaeste.

Äänestää ulkomailta

Ulkomailta mennee äänestää kahela laila. Sie saatat etukätheisäänestää monessa ruottalaisessa ampasaatissa ja konsylaatissa elikkä preiviäänestää. Ensimäinen päivä ko sie saatat laittaa sinun preiviäänen ulkomaila ja lähättää sen Ruothiin oon 45 päivää ennen vaalipäivää.

Äänestysoikeus ruottalaisissa vaalissa

Sie häyt olla täyttäny 18 vuotta viimisthääns vaalipäivänä ette olla äänestysoikeutettu. Se jällaa joka vaalissa. Säänöt eroavat valtiopäivävaalin, rekiuunivaalin, kunnanvaalin ja EU-vaalin välissä.

Äänestysoikeus valtiopäivävaalissa

Sulla oon äänestysoikeus valtiopäivävaalissa jos sie:

• olet täyttäny 18 vuotta viimisthääns vaalipäivänä,
• olet ruottalainen kansalainen ja
• olet elikkä olet ollu kansankirjoila Ruottissa.

Äänestysoikeus rekiuunivaalissa ja kunnanvaalissa

Sulla oon äänestysoikeus rekiuunivaalissa ja kunnanvaalissa jos sie:

• olet täyttäny 18 vuotta viimisthääns vaalipäivänä,
• olet ruottalainen kansalainen ja kansankirjoila kunnassa, rekiuunissa elikkä
• kansalainen EU-maassa elikkä Iislantissa elikkä Norjassa ja olet kansankirjoila kunnassa ja rekiuunissa, elikkä
• kansalainen muussa maassa, elikkä et ole kansalainen mishään maassa, ja olet ollu kansankirjoila Ruottissa vähhiinthääns kolme vuotta peräkkää ennen vaalipäivää, ja olet kansankirjoila kunnassa elikkä rekiuunissa.

Äänestysoikeus EU-vaalissa

Sulla oon äänestysoikeus EU-vaalissa jos sie:

• olet täyttäny 18 vuotta viimisthääns vaalipäivänä,
• olet ruottalainen kansalainen ja olet (elikkä olet ollu) kansankirjoila Ruottissa, elikkä
• olet kansalainen muussa EU-maassa, kansankirjoila Ruottissa ja olet ilmottannu ittesti ruottalaisheen ääniluettelhuun viimisthääns 30 päivää ennen vaalipäivää.

Äänestysoikeus päätethään 30 päivää ennen vaalipäivää

Sinun äänestysoikeus päätethään tioitten mukhaan Veroviraston kansankirjarekisterissä 30 päivää ennen vaalipäivää. Net, joilako oon äänestysoikeus, otethaan matkhaan ääniluettelhuun joka oon lista jossako oon kaikin jokka saavat äänestää vississä vaalissa. Sie et siis tartte ilmottaa itteä ääniluettelhuun ette saaja äänestysoikeuen.

Kaikin joilako oon äänestysoikeus saavat äänestyskortin

Kaikin joilako oon äänestysoikeus vaalissa saavat äänestyskortin. Se lähätethään sinun tikitaahliin preiviloohvaan elikkä postin kautta sinun kansankirjaosotheesheen elikkä erityisheen postiosotheesheen jos sie olet ilmottannu semmosen.

Sulla ei tartte olla sinun äänestyskortti matkassa ko sie etukätheisäänestät elikkä ko sie äänestät sinun vaalipaikala vaalipyhänä.

Näin vaaliseetelit ja henkilöäänestäminen toimivat

Vaaliseeteliä pittää olla kaikissa paikoissa jossako sie saatat äänestää.

Vaaliseetelit oon färimerkatut ette näyttää mihinkä vaahliin net jällaavat:

• Valkeat vaaliseetelit – kunta.
• Siniset vaaliseetelit – rekiuuni.
• Keltaset vaaliseetelit – valtiopäivät.
• Valkeat vaaliseetelit (EU-vaalissa) – Europpaparlamentti.

Vaaliseetelissä seisoo kansa mihinkä vaahliin ja mihinkä aluheesheen se jällaa, esimerkiksi vishiin vaalipiihriin.

Ruottalaisessa vaalissa sie äänestät aina yhtä parttiota. Sitten sie saatat valikoittea jos sie halvaat henkilöäänestää jotaki parttion kantitaattiaki.