Ylheisiä vaalia Ruottissa
Published: 11 May 2026
Ruottissa oon neljä ylheistä vaalia – vaali valtiopäivile, rekiuunivaltuusthoon, kunnanvaltuusthoon ja Eurooppaparlamenthiin.
Ylheisiä vaalia
Ruottissa oon neljä ylheistä vaalia:
- valtiopäivile
- rekiuunivaltuusthoon
- kunnanvaltuusthoon
- Europaparlamenthiin
- Ortinaari vaalit valtiopäivile, rekiuuni- ja kunnanvaltuusthoon piethään syyskuun toisena pyhänä joka neljäs vuosi.
Vaali Europpaparlamenthiin piethään huhtikuussa, toukokuussa, kesäkuussa elikkä heinäkuussa joka viies vuosi niinku Eurooppaparlamentti päättää. Vaali piethään itten kunki EU-maan kansalisen vaalilain mukhaan ja Ruottissa vaalilaki sannoo ette vaalipäivä oon aina pyhäpäivänä.
Ylheinen ja sama äänestysoikeus ja vaphaat, salhaiset ja suorat vaalit
Ruottalainen vaalisysteemi perustuu ylheisheen ja samhaan äänestysoikeutheen ja ette vaalit oon vaphaat, salhaiset ja suorat. Vaalisysteemi oon tesentraliseerattu ja transparantti ja sen mukhaan vahva. Sitä ohjaa hallitusmuoto, joka oon yks neljästä peruslaista.
Ylheinen äänestysoikeus
Äänestysoikeus määräytyy vain niitten vaatimuksitten perustheila mitä ihmiset ylheisesti saattavat täyttää, niin sanottu ikä, kansalaisuus ja asuntopaikka.
Sama äänestysoikeus
Kaikila äänestäjillä oon oikeus vaikuttaa vaalitulostaa, niin sanottu yks ääni henkilöä kohitti.
Vaphaat vaalit
Ei kukhaan muu saa päättää mitä äänestäjä pittää äänestää eikä kelhään ole pakko äänestääkhään.
Salhaiset vaalit
Äänestäjällä ei ole pakko näyttää elikkä sanoa kunka se oon äänestänny.
Suorat vaalit
Äänestäjät valikoittevat net jokka esimerkiksi istuvat valtiopäivilä elikkä kunnanvaltuustossa.