Glasin ko tlo izboreskoro lokali ko izboreskoro dive

Šaj te glasine ko tlo izboreskoro lokali ko izboreskoro dive.

• E parlamenteskoro izbor, regiakoro izbor hem opštinakoro izbor sakofar održinenape ko dujto purano kurko/nedela ko septemvri masek sako štarto berš.
• EU-izbor održinelape ko april, maj, juni ja juli sako pandžto berš. Ki Švedia e izboreskoro dive sakofar tano jekh purano kurko.
• Ki tli glasibaskiri karta navedinelape ko savo izboreskoro lokali šaj te glasine ko izboreskoro dive hem e bučakoro vakti ko izboreskoro lokali.
• Na ka valjani te le tuja tli glasibaskiri karta ama ka valjani tuke važime id- dokumentia ja džiko so ka potvrdinel tlo identiteti te na sian pendžardo e glasibaskere priemnikoske. Tegani, odova manuš ka valjani te sikavel jekh id- dokumenti.

Porano glasibe

Šaj porano te glasine bilo kote ki phuv.

• Šaj porano te glasine taro 18 dive angleder e izboreskoro dive hem dži ko izboreskoro dive.
• Na ka valjani te le tuja tli glasibaskiri karta ama ka valjani tuke važime id- dokumentia ja džiko so ka potvrdinel tlo identiteti te na sian pendžardo e glasibaskere priemnikoske. Tegani, odova manuš ka valjani te sikavel jekh id- dokumenti.

Le pomoč taro jekh kuriri

Te glasinelpe kurirea značinela so džiko aver ka glasinel namesto tute ko tlo izboreskoro lokali ja ko jekh lokali bašo porano glasibe.

• O jekhto dive keda šaj te spremine tlo kurireskoro glasibe tano 24 dive angleder e izboreskoro dive. O kuriri šaj sade te predainel tlo glaso keda ka phravelpe o porano glasibe.

Šaj te glasine kurirea te;

• sian nasvalo
• sian phureder
• isi tut funkcionalnikano pharipe
• sian phanlo ko pritvor ja ko kazneno- popravno domi
• bešea ja prestoinea ki gaveskiri poštakiri linija ( kontaktirin e Postnord)

Le pomoč tari i opština

Te sine tut pharipe te dža ko jekh izboreskoro lokali ja ko lokali bašo rano glasibe hem nikas na pendžarea so šaj te ovel tlo kuriri, šaj tli opština te organizirinel či e glasibaskoro priemniko te avel ki tute te ljel tlo glaso, kaske vakerelape ambulirimo glasibaskoro priemniko. Šaj te kontaktirine tle opštinaja baši pobut informacia.

Rode pomoč glasibaske ko lokali

Tut kas isi funkcionalnikano pharipe ja diso slično šaj te zamoline jekhe glasibaskere priemniko baši pomoč. E glasibaskere priemnikon isi službeno tajna hem na sminena nikaske te vakeren kaske glasindžan. Isto šaj tuja te le disave avere palo izboreskoro ekrani či te pomožinel tut te glasine ama e glasibaskoro priemniko mora sakova far te ovel prisutno, bizo obzir odoleske.

Sa o lokalia ka oven dostupno e manušenge funkcionalnikane pharipaja.

Glasin taro inostranstvo

Isi duj čania te glasinelpe taro inostranstvo. Šaj rano te glasine ko pobut švedikane ambasade ja konzulati ja glasiba poštaja. O jekhto dive ka sredine tlo poštakoro glaso ko inostranstvo hem odova ka bičhale 45 dive angleder e izboreskoro dive.

Hako glasibaske ko švedikane izboria

Či te ovel tut hako glasibaske mora te phere 18 berš hemkasno ko izboreskoro dive. Odova važinela pri sa o izboria. O pravilia razlikuinenape maškar e parlamenteskoro izbori, regioneskoro izbori, opštinakoro izbori hem EU- izbori.

Hako glasibaske ko parlamenteskoro izbor

Isi tut hako glasibaske te:

• pherdžan 18 berš hemkasno ko izboreskoro dive
• sian švedikano državjani hem
• sian ja sian sine registririmo ki matično evidencia ki Švedia

Hako glasibaske ko regiakoro izbori ja opštinakoro izbori

Isi tut hako glasibaske ko regiakoro izbori ja opštinakoro izbori te:

• pherdžan 18 berš hemkasno ko izboreskoro dive,
• sian švedikano državjani hem sian uvedimo ki matično evidencia ki opština, regia, ja
• državjani ki jekh EU- država ja Island ja Norveška hem sian uvedimo ki matično evidencia ki opština hem regia, ja
• državjani ki jekh aver država ja sian bizo državjanstvo, hem sian sine uvedimo ki matično evidencia ki Švedia hemhari trin berš redaja angleder e izboreskoro dive, hem sian uvedimo ki matično evidencia ki opština ja ki regia.

Hako glasibaske ko EU-izbor

Isi tut hako glasibaske ko EU-izbor te:

• pherdžan 18 berš hemkasno ko izboreskoro dive,
• sian švedikano državjani hem sian (ja sian sine) uvedimo ki matično evidencia ki Švedia, ja
• sian državjani ki jekh aver EU-država, uvedimo ki matično evidencia ki Švedia hem registririndžan tut ko švedikano glasibaskoro spisako hemkasno 30 dive angleder e izboreskoro dive.

O hako glasibaske odlučinelape 30 dive angleder e izboreskoro dive

Tlo hako glasibaske odlučinelape taro o informacie so isi ko spisako matično evidencienge ko Porezeskoro ured, 30 dive angleder e izboreskoro dive. Odolen kas isi hako glasibaske lenape ko jekh glasibaskoro spisako soj tano jekh spisako sarinencar so šaj te glasinen ko jekh odredimo izbor. Znači, tu na ka valjani te prijavine tut ko glasibaskoro spisako či te ovel tut hako glasibaske.

Sarine kas isi hako glasibaske ka dobinen glasibaskiri karta

Sarinen kas isi hako glasibaske ko jekh izbor ka dobinen glasibaskiri karta. Ka bičhavelpe ko tlo digitalnikano poštakoro sanduko ja poštaja ki tli matično evidenciakiri adresa ja ki posebno poštakiri adresa te prijavindžan ola.

Na ka valjani te le tuja tli glasibaskiri karta keda ka glasine rano ja keda ka glasine ko tlo lokali izborenge ko izboreskoro dive.

Adžahar funkcirinena e glasibaskere listia hem glasibe manušeske

Glasibaskere listia isi ko sa o thana kote šaj te glasine.

E glasibaskere listia tane označime boencar
i te sikavelpe ko save izboria važinena:

• Parne izboreskere listia - i opština.
• Plavo izboreskere listia – i regia.
• Žuto izboreskere listia - o parlamenti
• Parne izboreskere listia ( pri EU-izbori) – Evropaparlamenti

Ko glasibaskoro listo isto navedinelape ko savo izbor hem savi oblast važinela, ko misal jekh posebno izboreskoro krugo.

Ko švedikane izboria sakofar glasinea jekhe strankake. Palo odova šaj te odbirine te mangljan te glasine džikaske taro e strankakere kandidatia.