Rijmmo válljimij Sámediggáj
Válljimrijmmo válljimij Sámediggáj 2025. Rijmon diededuvvi ájge umasse dáhpájdusájda válljima åvddål, válljimin ja válljima maŋŋela.
Tabellan vuollein dån vuojná ájgijt ájnas dáhpájdusájda ma li fámon válljiij Sámediggáj moarmesmáno 18.b. 2025. Sidá gus dån låhkåt ienebuv válljima, jienastimriektá birra, ja gåktu dån dagá jienastittjat ja ienep, dån gávna bielen Válljim Sámediggáj 2025.
2024
Biejvve | Dáhpájdus |
|---|---|
Gålgådismáno 20.b. | Maŋemus biejvve gå diededibme jienastimlåhkuj galgga boahtám Sámediggáj. Diededibme gávnnu Sámedikke webbabielen. |
Basádismáno 15.b. | Sámedikke válljimsiebrreráde galggá maŋemusát dán biejve vuododum båddåsasj jienastimlågov. Dat galggá de gávnnut sadjihin moatten sájen rijkan gesi sihtá dav gähttjat. |
Javllamáno 15.b. | Válljimsiebrreráde märrádusá gujddim birra gudi galggi tjáleduvvat jienastimlågon galggá boahtám Norrbottena lenastivrraj. |
2025, válljimjahke
Biejvve | Dáhpájdus |
Guovvamáno 17.b.* | Norrbottena lenastivrra mierret gujddimij hárráj ma guosski båddåsasj jienastimlåhkuj. |
Sjnjilltjamáno 1.b. | Sámedikke válljimsiebrreráde maŋemusát dán biejve vuodot låhpalasj jienastimlågov. |
Sjnjilltjamáno 10.b.* | Juohkusa, belludagá ja sjimugis organisasjåvnå ma sihti oassálasstet válljimin gslggi maŋemusát dán biejve diededit sijá namádisáv ja sijá kandidáhtajt ja rávvit válljimsiedilijt. |
Vuoratjismáno 16.b. | Jienastimkårttå ålgoldiskuvera hámen, ja ábnnasa brevvajienastibmáj, rájaduvvi gejda li tjáledum jienastimlågon.
Brevvajienastibme álgat Svierigin ja ålggorijkan. |
Moarmesmáno, válljimbiejvve | Válljimbiejvve l goalmát ájllekmoarmesmánon, juohkka näljat jage. Válljijiddje máhtti jienastit valljimlanjájn Svieriga birális. Da li ráhppot kloahkka 8–20.
Jiena ma li duostodum válljimlanjájn rájaduvvi Norrbottena lenastivrraj. |
Moarmesmáno 26.b. | Áramusát avta vahko válljima maŋŋela álgat jienaj tjoahkkájriekknim Norrbottena lenastivran. Norrbottena lenastivrra gähttjá ja riekkni jienajt, juogat mandáhtajt ja nammat ájrrasijt ja sadjásattjajt. Boados tjielggiduvvá Válljimfábmudagá webbabielen nåv ruvva gå l gárves. Válljim máhttá gujddiduvvat lågen biejven válljimbåhtusa almodimes. |
* Jus biejvve lága milta l ájllek de maŋemus biejvve l dan sadjáj boahtte árggabiejvve.