Published: 17 February 2025
Jiänastemereäktta jah jiänastemelåhkkuo
Gájkh giäh sijtth jiänastit välljemisne Sámiedïggáje tjuavvareäh tjuadtjuot fáruosne jiänastemelåhkuosne. Dássnie ådtjuoh dájđđiet iänabe diedietemijde.
Giä udtja jiänastit välljemisne Sámiedïggáje?
Gueddetmánuon 18 b. 2025 leä välljeme Sámiedïggáje. Jiänastïdtjat välljemisne tjuavvarh tjuadtjuot fáruosne jiänastemelåhkuosne. Jiänastemelåhkkuo leä lïsstuo gájkijne geäjdnie leä jiänastemereäktta jah udtja jiänastit.
Gukttie tjálátuvvuv jiänastemeluhkkije?
Vaj tjálátuvvat jiänastemeluhkkije tjuavvarh ülledit såmies biässamerávkalvassijde. Jüs dådna ülledh biässamerávkalvassijde galgh dådna rájjat diedietiemiev jühtte dådna sïjdh tjuadtjuot fáruosne jiänastemeluhkkije.
Miŋŋijmust beäjvvie vaj diedietit jiänastemeluhkkije leä gålgguománuon 20 b. 2024.
Jüs dådna leä tjudtjame fáruosne jiänastemeluhkkije üvdiebe ih darbah diedietit uđđasiste.
Rávkalvassh vaj tjuadtjuot fáruone jiänastemelåhkuosne
- Dådna leäh sverjjeke jallá ulgguorïjkake viäsát.
- Dådna leäh sábmie, såmies rávkkalvassij mehte, jah
- leä 18 jábien vuaras sjaddáme miŋŋijmust välljemebiejviesne.
- Jüs dådna leä ulgguorïjkkaladtje viäsát tjuavvarh urruot ålmmagetjálieduvvame Sverjjesne unniemust gulbma mïŋŋálahkkuoj jábieh välljemebiejviesne.
Rávkalvassh vaj ryöknnatuvvat sábmiene välljemisne
Dådna galgh ussjadh jïjtjuvte sábmie urruot, jah nåvváj dájsstie náganijste:
- dådna leä sámástamme hiäjmasne, jallá jühtte
- såmies duv äjttegijste, ájjájste jallá áhkájste sámásteäh jalla leäh sámástamme hiäjmasne, jallá jühtte
- duvsnie leä äjttege giä leä jallá lij tjálátuvvame jiänastemeluhkkije Sámiedïggáje.
Båddasadtje jiänastemelåhkkuo
Jiänastemelåhkkuo mierrieduvvá guökttie lävkijde. Båddasadtje jah stuövies jiänastemelåhkkuo.
Sámiediggien välljemeseäbrrieráđđie mierriede båddasadtje jiänastemelåhkuov miŋŋijmust juhtátmánuon 15 b. 2024.
Båddasadtje jiänastemelåhkkuo såjttá güjđđetuvvat.
Statistïjkka daj bijjiele geässnie leä båddasadtje jiänastemereäktta
Güjđđet båddasadtje jiänastemelåhkuov
Båddasadtje jiänastemelåhkkuo såjttá güjđđetuvvat geässtie:
- juhkka leä jïjtjuvse diedietamme jiänastemeluhkkije valla ij lam tjálátuvvame
- juhkka leä tjálátuvvame båddasadtje jiänastemeluhkkije jah sïjttá güjđđet jühtte jiätjá almatje leä tjálátuvvame jiänastemeluhkkije.
Güjđđelvis tjuavvare båhtiet Norrbottenen Liänastïvrráje miŋŋijmust juvllamánuon 15 b. 2024.
Güjđđelvis geähttjaluvvá bïjkuos tjåhkkaniemiesne Norrbottenen Liänastïvrasne guavvamánuon 17 b. 2025.
Liänastïvran mierriediemiev ij máhtieh güjđđet.
Stuövies jiänastemelåhkkuo
Sámiediggien välljemeseäbrrieráđđie mierriede stuövies jiänastemelåhkuov miŋŋijmust njukttjamánuon 1 b. 2025. Stuövies jiänastemelåhkuosne gåvdnijeäh gájkh giäh biässah jiänastit välljemisne.