Published: 17 February 2025
Jienastimräkkta ja jienastimlåhko
Gájka ma sihti jienastit välljimin Sámediggáj verrtiji jienastimlågon årrot. Dánne ådtjo diehtet ienabuv njuolgadusaj birra.
Gie udtju jienastit välljimin Sámediggáj?
Mårbmesmáno 18 biejven 2025 lä välljim Sámediggáj. Jus sida jienastit välljimin verrtij tjuadtjot jienastimlågon. Jienastimlåhko lä lissto gájkaj ma idni jienastimriektav ja udtju jienastit.
Gukkte biesav jienastimluhkuj?
Jus sida jienastimlågon årrot dä verrti nágan ruodtjolvasajt dävvdet. Jus ruodtjolvasajt dievdá dä galga rájjat diededimev ahte sida jienastimlågon årrot.
Diededibme verrti Sámediggáj båhtet maŋemus gålgådismáno 20 biejven 2024.
Jus lä urrum jienastimlågon åvvdål dä i dárbahe diededit årråsit.
Ruodtjolvasa jienastimlågon årrot
- Dån lä sverik vaj ullgorijka viesát.
- Dån lä sábme, såmes ruodtjolvasa mehti, ja
- ullim 18 jábe maŋemus välljimbiejven.
- Jus lä ullgorijka almatj dä verrti tjáleduvvum urrum Sverjin binnámus gålbmå jábe maŋŋálågoj välljimbiejven.
Ruodtjolvasa sábmen duhkkiduvvut välljimin
Dån galga tuhttjit dån lä sábme, ja duädden:
- duvne lä jalá lä urrum sámegiella hiejman, jalá
- náganin duv iejgádijst, áhtje jalá tjidtje iejgádijst lä jalá lä urrum sámegiella hiejman, jalá
- duvne lä iejgát gie lä jalá gie lä urrum jienastimlågon Sámediggáj.
Állgo ja maŋemus jienastimlåhko
Jienastimlåhko biejaduvvu guktij lävkij. Állgo ja maŋemus jienastimlåhko.
Sámedigge välljimsäbbrerárre biejjá állgo jienastimlågov maŋemus bassemáno 15 biejven 2024. Dat gävdnu umas sajen rijkan gájkajda ma sihti dav vuäjdnet.
Állgo jienastimlåhko máhttá luojoduvvut.
Luojjot állgo jienastimlågov
Állgo jienastimlåhko máhttá luojoduvvut:
- dasste gie lä diededam ietjas jienastimluhkuj men ij lä duhkkiduvvum,
- dasste gie lä tjáleduvvum állgo jienastimluhkuj ja sihtá luojjot ahte nágan ietjá lä jienastimluhkuj tjáleduvvum.
Luojjomtjála verrti Norrbottena liena lienastivvraj båhtet maŋemus jåvvlåmáno 15 biejven 2024.
Luojjomtjála pruvvu bigos tjåhkånimen Norrbottena liena lienastivran guovvamáno 17 biejven 2025.
Ij máhte Lienastivra mierrádusav luojjot luojjomtjállaga hárráj.
Maŋemus jienastimlåhko
Maŋemus jienastimlågon lä gájka ma udtju jienastit välljimin.