Jienastanvuoigatvuohta ja jienastuslohku
Buot geat háliidit jienastit Sámediggeválggas fertejit leahkit jienastuslogus mielde. Dás lea eanet diehtu.
Gii oažžu jienastit Sámediggeválggain?
Sámediggeválggat leat 18át beaivvi miessemánus 2025. Jus galggat beassat jienastit válggain de fertet leahkit jienastuslogus mielde. Jienastuslogus oaidná geas lea jienastanvuoigatvuohta ja de maid oažžu jienastit.
Got ilmmuhan jienastuslohkui?
Jus galggat beassat jienastuslohkui de fertet ollašuhtit muhtin dovddaldagaid.
Jus don ollašuhtat dovddaldagaid ja háliidat beassat jienastuslohkui de fertet ilmmuhit jienastuslohkui.
Sámediggi dárbbaša du ilmmuhusa jienastuslohkui maŋimus 20át beaivvi golggotmánus 2024.
Jus leat juo mielde jienastuslogus de it dárbbaš ilmmuhit fas.
Jus háliidat beassat jienastuslohkui de fertet ollašuhtit daid
- Don leat Ruoŧa stáhtaborgár dahje olgoriika stáhtaborgár.
- Don leat sápmelaš, dasa gullojit muhtin dovddaldagat, ja
- Don leat ovdal válgabeaivvi deavdán 18 dahje don deavddát válgabeaivvi 18.
- Jus leat olgoriikalaš de don fertet válgabeaivvi leamaš čállon Ruoŧas unnimusat golbma jagi maŋŋálaga.
Dovddaldagat sápmelažžan válggas:
- Don meidnet ahte leat sápmelaš, ja dasalassin juoga dain:
- Don sámástat ruovttus dahje sámegiella lea gullon du ruovttus, dahje
- Juobbá du váhnemiin, áddjáin dahje áhkkuin sámástit dahje leat sámástan ruovttus, dahje
- Okta du váhnemiin lea dahje lea leamaš Sámedikki jienastuslogus mielde.
Gaskkaboddosas ja loahpalaš jienastuslohku
Jienastuslohku mearriduvvo guovtti lávkkis. Okta gaskkaboddosas ja okta loahpalaš jienastuslohku.
Sámedikki válgalávdegoddi mearrida gaskkaboddosas jienastuslogu maŋimus 15át beaivvi skábmamánus 2024.
Váidalit gaskkaboddosas jienastuslogu
Sii geat sáhttet váidalit gaskkaboddosas jienastuslogu leat:
- Son gii lea ilmmuhan jienastuslohkui muhto ii leat dohkkehuvvon,
- Son gii dohkkehuvvui gaskkaboddosas jienastuslohkui ja háliida váidalit soapmasa gii maid dohkkehuvvui jienastuslohkui.
Norrbottena leanastivra galgá oažžut váidalusa maŋimusat 15át beaivvi juovlamánus 2024.
Váidalus dárkkistuvvo álmmolaš čoahkkimis Norrbottena leanastivrras 17át beaivvi guovvamánus 2025.
Leanastivrra mearradus váidalusa birra ii maná váidalit.
Loahpalaš jienastuslohku
Buot geat ožžot jienastit Sámediggeválggas leat mielde jienastuslogus.
